БДАМЛМ пачаў сумесны выдавецкі праект з Саюзам пісьменнікаў Казахстана

20 жніўня 2024 года ў Беларускім дзяржаўным архіве-музеі літаратуры і мастацтва (далей — БДАМЛМ) адбылася сустрэча дырэктара архіва-музея Алены Аляксандраўны Макаранка з паэткай, членам Саюза пісьменнікаў Казахстана, намеснікам галоўнага рэдактара рэспубліканскага літаратурна-мастацкага часопіса «Прастор» Любоў’ю Канстанцінаўнай Шашковай. У ходзе яе правядзення былі дасягнуты дамоўленасці па выданні анталогіі Беларуска-Казахстанскага супрацоўніцтва ў літаратурна-выдавецкай дзейнасці.

Л.К.Шашкова перадала на захоўванне ў архіў зборнікі «Літаратура Казахстана ў замежных крыніцах» і «Замежнае ўспрыманне літаратуры Казахстана», якія дазволяць больш цесна азнаёміцца з творчасцю класікаў і сучасных аўтараў Казахстана.

Беларуска-казахстанскія літаратурныя сувязі бяруць пачатак у трыццатых гадах мінулага стагоддзя, са стварэння Саюза пісьменнікаў рэспубалік. У 1936 г. упершыню выйшлі на беларускай мове пераклады вершаў Джамбула, Ільяса Жансугурава, Сакена Сейфуліна, прозы Беімбета Майліна. Кроўнай сувяззю змацавала гэтыя адносіны Вялікая Айчынная вайна. У вызваленні Беларусі, у аперацыі «Баграціён» удзельнічалі Жумагалі Саін, Джубан Мулдагаліеў, Сагінгалі Сеітаў, Музафар Алімбаеў, Леанід Скалкоўскі, камандаваў партызанскім атрадам Ады Шарыпаў, што знайшло адлюстраванне ў яго творчасці і звязала братэрскай сувяззю. У гады Вялікай Айчыннай вайны ў эвакуацыі ў Алматы знаходзіліся сем’і Якуба Коласа, Янкі Маўра. У пасляваенны час публікаваліся пераклады твораў Якуба Коласа, Рыгора Барадуліна, Максіма Танка і інш.

Сведкамі цеснага сяброўства беларускага і казахскага народаў з’яўляюцца архіўныя дакументы, якія захоўваюцца ў БДАМЛМ. Стварэнне новага зборніка дакументаў, нарысаў і артыкулаў, аб чым і было прынята рашэнне на гэтай сустрэчы, паслужыць далейшаму ўмацаванню сяброўскіх сувязей дзвюх краін.

1. А.А.Макаранка, Л.К.Шашкова і Т.У.Кекелева падчас сустрэчы.

2. А.А.Макаранка і Л.К.Шашкова падчас перадачы зборнікаў.