5 лістапада ў Беларускім дзяржаўным архіве-музеі літаратуры і мастацтва адбылася прэзентацыя кнігі «Сцежкамі жыцця» Паўліны Мядзёлкі

5 лістапада ў Беларускім дзяржаўным архіве-музеі літаратуры і мастацтва адбылася прэзентацыя кнігі «Сцежкамі жыцця» вядомай артысткі, педагога, літаратаркі, дзяячкі беларускага адраджэння Паўліны Мядзёлкі (1893 – 1974). Кніга ўбачыла свет у мінскім выдавецтве «Лімарыус» у серыі «Беларуская мемуарная бібліятэка».

Ад імя выдавецтва кнігу прадставілі Марына Шыбко і Аляксандр Фядута. Сказаўшы пра знакавую ролю П. Мядзёлкі ў беларускай культуры, яны перадалі слова Ганне Запартыцы, якой і належыць укладанне кнігі, а таксама прадмова і грунтоўныя каментары. Укладальніца распавяла пра шматлікія цэнзурныя перашкоды, якія зведала П. Мядзёлка, рыхтуючы да друку свае ўспаміны, што ўбачылі свет у 1974 г. – праз некалькі месяцаў пасля яе смерці. Новае ж выданне, заснаванае найперш на рукапісах, што захоўваюцца ў асабістым фондзе П. Мядзёлкі (БДАМЛМ, ф. № 403), пераважае папярэдняе амаль у тры разы. Яно ўвабрала ў сябе і ўжо вядомую першую кнігу «Сцежак жыцця» (але са шматлікімі адноўленымі фрагментамі), і другую кнігу, і «Беглыя нататкі для памяці. Факты, якія не могуць і не павінны быць апублікаваны», а таксама лісты і іншыя дакументы да гісторыі выдання ўспамінаў П. Мядзёлкі.

Вядучы архівіст Таццяна Кекелева ад імя ўсяго калектыву архіва-музея павіншавала Ганну Вячаславаўну з трайным святам: акрамя выхаду згаданай кнігі, яна адзначае 40-годдзе працы ў БДАМЛМ і 25-годдзе на пасадзе дырэктара гэтай установы.

Доктар філалагічных навук, прафесар БДУ Вячаслаў Рагойша зазначыў, што Паўліну Мядзёлку можна з поўным правам разглядаць не проста як мемуарыстку, але як пісьменніцу, і падзяліўся ўласным вопытам выдання твораў Сяргея Палуяна. Настаўніца і даследчыца літаратуры Ганна Севярынец расказала пра свае знаходкі, датычныя тэмы імпрэзы, – у прыватнасці, пра лісты П. Мядзёлкі да Пятра Глебкі, у якіх адлюстравалася і гісторыя першага выдання «Сцежак жыцця». У ролі самой Паўліны Мядзёлкі выступіла паэтка і тэлевядоўца Валярына Кустава, якая зачытала некалькі найбольш драматычных і эмацыйна напоўненых фрагментаў з кнігі.