Юридические документы, действовавшие на белорусских землях в период Великого Княжества Литовского, Русского, Жемойтского в составе Речи Посполитой – конфедерации с Королевством Польским

Привилей Жигимонта (Сигизмунда) II Августа, великого князя литовского и короля польского, на Магдебургское право городу Дисне.
Люблин, 20 января 1569 г.
Печатный документ. На старобелорусском языке. Помнікі права Беларусі XIV–XVI стст.: прывілеі на магдэбургскае права. Мінск: БелНДІДАС, 2019

Тэкст^[1]
Жикгимонт  Августъ. Чинимъ знаменито симъ нашимъ листомъ, кому будеть потреба того ведати, нинешнимъ и напотомъ будучимъ. Били намъ чоломъ подданые нши мещане дисенские и поведили перед  нами, ижъ по взятью замъку ншого Полоцкого через  неприятеля ншого великого кнзя московского, кгды з росказанья ншого в земли Полоцкои  замок нашъ Дисенскии  заложон, многие подданые з местъ ншихъ гсдрьскихъ, и кнзьскихъ, панскихъ и земянскихъ, духовныхъ  и светскихъ, опустивши домы и оселости свои, а иные з рукъ неприятелскихъ вышедши, верною подданостью ку намъ, гсдру своему прирожоному, склонившися, внеслися на мешканя вечное зъ жонами и з детми, и всими маетностями своими в тотъ краи  спустошалыи  до помененого замку ншого Дисенского, при которомъ домы собе побудовавши, острогъ немалыи  около места и вежи при немъ коштомъ и накладомъ своимъ властнымъ заробили, делы, гаковницами, ручницами, стрелбою водле можности своее на тотъ часъ башты запособили, еще над  то хотечи большою безпечностью тое место обваровати, в надею ласки ншое гсдръское, валы перекопами и збудованьемъ вежъ, прибавляючи стрельбы ку обороне, фундоватися при томъ замку ншомъ хочуть, даючи того справу, же з многихъ сторон  розныхъ панствъ ншихъ люд  купецкии  зъ жонами, з детми и зо всими маетностями своими на мешканье до того места ншого до нихъ ити беруться, кгды быхмо право маидебурское тому месту ншому надавши, пожитъки некоторие, якие суть и в ынъшихъ местехъ панства ншого Великого Кнзьства Литовского, тому месту Дисненскому место и на ратушъ привлащили и листомъ нашимъ на вечность упривильевали. О чомъ жо и пан   виленскии, гетман  нашъ наивышъшии  Великого Кнзьства Литовского, староста городенскии, державца могилевскии  панъ Григореи  Александрович  Ходкевич  за ними листомъ своимъ у причине нас  жадалъ, и староста дисненскии  панъ Боркулабъ Иванович  Корсакъ^[2]  сведецство о хутливыхъ службахъ ихъ противко намъ, гсдру, даючи, до нас  писалъ.

1. А такъ мы, з ласки ншое гсдръское, на примову пана виленского и за ознаименьемъ старосты дисненского о ихъ вере и хути ку службамъ ншимъ, и на чоломъбитье тых  мещанъ нашихъ дисенскихъ, то есмо вчинили а право маидебурское имъ дали есмо и симъ листомъ ншимъ тому месту ншому надаемъ вечными часы а вызволяемъ всихъ мещанъ дисенскихъ, купъцовъ и ремесниковъ тамошнихъ всякихъ в паркане и за парканомъ, на кгрунте, тому месту от  нас, гсдра, наданыхъ и на нихъ мешкаючихъ, и которие напотомъ на голыхъ пляцах  местскихъ в паркане и за парканомъ з ыншыхъ местъ тамъ на мешканье зберуть и будуються, от  присуду замъкового старостиного и его врадниковъ Статутомъ земъскимъ панства ншого Великого Кнзьства Литовского, и от  децкихъ и винъ замъковыхъ, на вечность, але мають ся вси мещане дисенские правомъ своимъ маидемъбурскимъ судити и справовати во всемъ справовати по тому, яко судять мещане в ыншихъ местахъ ншихъ гсдръскихъ упривильеваныхъ панства ншого Великого Кнзьства Литовского.

2. А печать тому месту ншому Дисенскому на вечные чсы надаемъ, гербъ лодью, которою вряд  местскии  судовые и иные всякие справы местские печатовати и отправовати мають звычаемъ иныхъ мест  нашихъ упривильеваныхъ вечне.

3. А што ся дотычеть воита тамошнего, ино мы врад  воитовъскии  з рамени ншого гсдръского на старосту ншого тамошнего дисенского теперешнего и потом  будучихъ старостъ дисенскихъ прекладаемъ и симъ привильемъ ншимъ злецаемъ, чинечи постановенье в томъ на вечные чсы тымъ обычаемъ, ижъ старостове нши дисенские на местцу воитовъскомъ от  нас, гсдра, быти мають.

4. А мещане дисенские на кождыи  год  по чотыри особы людеи  добрыхъ, бачных  и ростропныхъ, в тамошнемъ месте оселыхъ, которые бы тежъ могли и праву маидебурскому спростати, выбирати и старосте дисненскому, яко воиту ншому, оповедати, а староста з оныхъ чотырохъ особъ одног, которого на то годного и справного будеть розумети, на местцо воитовское лентвоитомъ месту Дисенскому подавати маеть, присегу звычаиную на тотъ вряд  лентвоитовъскии  от  него принявши, и тымъ способомъ в кождыи  год  обиранье лентвоита чинено быти маеть.

5. А лентвоитъ, вряд  здаючи, повинен  будеть  кождому зо всего усправедливитися перед  старостою, естли бы кому што над  право уделалъ. Которыи  лентвоитъ годовыи  з лавниками и присяжниками своими маеть вси справы, суду воитовскому належачие, яко речи кривавые, такъ и иные всякие справы поточные судити, радити и отправовати, винъныхъ с права на горло всказывати, вед  же не иначеи  во всемъ заховываючи и справуючися, одно водле статуту права маидеборского.

6. А естли бы ся коли реч  якая великая приточила, жебы ее лентвоитъ самъ отправити не могъ, тогды мають о томъ старосте тамошнему дисненскому, яко воиту головному, знати дати. А староста з местъца воитовъского повинен  будеть самъ на ратуши становитися и таковые речи такъже правомъ маидебурскимъ, а не инакъшимъ, с присяжниками и лавниками своими судити, справовати и отправовати, винъных  карати с права водле статуту^[3]  кождого.

7. Што ся дотычеть бурмистровъ и радец  годовыхъ, тых  лентвоит  з мещаны тамошними на кождого особу по чотыри члвеки годныхъ подавши оповедати будеть^[4]  старосте ншому яко воиту головному. А староста з местца воитовского межи тою личбою толко, колько будеть надобе, бурмистров  и радец  обрати и, присягу от  нихъ принявши, справу местскую имъ злецати маеть.

8. А кгды год  свои  выдержать, староста ншъ з мещаны яко с прыходов, такъ и росходов  местскихъ маеть з нихъ личбы слухати, естли ими пристоине шафовали, и кождому укривжоному з нихъ справедливость чинити.

9. А где бы се кому с подданыхъ нашихъ мещан  дисенскихъ або кому жъ колвек  от  суду старосты дисенского яко воита головного, або от  лентвоита его з уряду воитовского, або от  бурмистров  и радец  кривда и уближенье якое у справедливости его або в чомъ кольвекъ видела, тогды кожъдому от  суду ихъ апеляцыя до нас, гсдра, допущона маеть быти^[5].

10. А пожитъки тому месту ншому зъ щодробливости ншое гсдръское на семъ привилью нашомъ поменити есмо велели, то естъ померное от  меры, вагу великую и малую, и важное, а с крамниц, и с клетокъ, и будокъ местскихъ, и от  местца платъ ратушовыи  даемъ на вечность, котории  межи собою наслушнеи, звычаемъ иныхъ местъ нашихъ, где мещане права маидебурского уживають, постановити мають, справуючися без  обтежливости посполитого члвека тамошнего, и людеи  приеждчихъ, и поселскихъ.

11. А за то будуть повинъни мещане ратушъ порадныи  збудовати, парканъ и бакъшты около места поправовати и знову на моц  будовати и землею фасовати, дела, гаковницы, ручницы, порохи, стрелбу и брони достатокъ запособляючи прибавляти, в месте порадку от огню и часу небеспечности от  неприятеля пилне догледати и сторожу всю^[6]  в месте и на баштахъ мевати.

 12. А што се дотычеть сторожи полное, с тои  они мают  заховатися по тому, яко мещане полоцкие за держанья нашого гсдръского перед  взятьемъ оного замъку Полоцъкого черезъ неприятеля ншого, великого кнзя московского, заховали и справовалися.

13. А^[7]  будованья паркану^[8]  около места и баштъ, того сами межи собою мещане пилне мают  догледати и уставляти своихъ приставов  над  роботниками, вед  же не инак  будуючи и поправуючи, одно яко имъ будеть от  старостъ нашихъ тамошних  и от  его врадников  зъ замку росказано.

14. А часу небезпечного от  неприятеля в месте и на паръкане мают  мещане во всемъ быти послушни старост  наших  тамошних ^[9]  дисненскихъ, яко в речи властнои  ншои  гсдръскои, которая до судовое справы ничого ся не стегаеть и овшемъ в таковыхъ речахъ часу небеспечности в послушенстве своемъ ку врядови ншому замъковому намъ, гсдру, верне служити будуть повинъни.

15. Корчмы медовые, пивные, горелъчаные, солодовни, бровари, отъ того всего капъ и платъ маеть с того места ншого Дисенского ити до скарбу ншого вечными чсы по тому, яко и в ыншихъ местех  ншихъ упривильеваныхъ заховывается. Вед  же што ся дотычеть корчомъ пивныхъ, о тые они намъ, гсдру, били чоломъ, абыхмо имъ волно в домех  своихъ без  даванья капии  и иншихъ платов  пиво держати, поведаючи, же мещане полоцкие з ласки ншое гсдръское тую волность мели. Ино естли мещане полоцкие волни были от  капи пивное в домех  своихъ шинкъ пивныи  волне держачи, тогды и мещане дисенские по тому жъ мають быти заховани вечне.

16. Зъ кгрунтов  местскихъ, которие имъ з ласки ншое гсдръское приданы и назначоны будуть и которие вжо на сес  час  держать, с тыхъ цынши мають давати, яко имъ уставу от  ревизоров  ншихъ з росказанья ншого будеть дана, прикладомъ иныхъ местъ ншихъ упривильеваныхъ.

17. Мають тежъ мети волность мещане дисенские на будованье паркановъ и домов  своихъ дерево и на дрова на огреванье брати с пущъ нашихъ гсдръскихъ, близъко к тому месту прилеглых. Вед  же абы ся заразъ не выполонило и на пришлыи  час  заховано, маеть староста ншъ дисенскии  завести и певными копъцами заграничити, поколе мають мети въездъ до пущи ншое.

8. Паствиска, выпусты около места быдлу своему мещане мають мети вольно тамъ, где им  от  старосты ншого, за росказаньем  ншимъ, будеть заведено.

19. Церкви вси, которые ку фале Божои  мещане своимъ накладомъ в месте тамошнемъ постановили, побудовали и потомъ побудують, тые мають быти въ ихъ местскомъ подаванью и заведанью. А вед  же владность над  попы и въезды на пригледанье учителев  въ вере хрестьянъскои  маеть быти владыкъ ншихъ вечными часы по тому, яко ся здавна около тыхъ въездовъ в земли Полоцкои  и Витебъскои  заховывало.

20. Братъства, каноны, празники годовые, тые мают  мети два разы в рок. На годовые празники, ^[10]  коли сами межи собою постановятm, пожитокъ с того церковным  справамъ примножаючи водле давного звычаю полоцкого, вед  же тымъ обычаемъ, яко бы тыми канунами корчмамъ и пожитъкамъ ншимъ шкода не была.

21. Волни тежъ будуть мещане дисенские збудовати собе лазни местские, колько бы была потреба, с которых  доход  и пожиток  мает  ити на место тамошнее вечными чсы. Вед  же тые лазни мають быти будованы на местцахъ безпечных  от огня, не поблизу домов  местскихъ, але на стороне от  места, при воде, а того постерегаючи, абы вжо иныи  нихто з мещан  тамошних  в домех  своихъ лазен  мети не смел, под  винами на то з уряду положоными.

22. То тежъ мещаномъ дисенскимъ объваровываемъ и упевняемъ, ижъ подвод  всякихъ, так  посланцомъ и гонцомъ ншимъ гсдръскимъ, яко и старостинымъ, и тежъ кнзьскимъ, панскимъ, духовных  и светских, и никому иному не мають и не будуть повинни^[11]  дармо, толко за пнзи по уставе ншои  гсдръскои, яко се и в ыншихъ местех  нших  упривильеваныхъ заховываеть.

23. Десятники и вси драбы ротъ пешихъ, которые в томъ месте Дисенскомъ на кгрунътехъ местскихъ побудовалися и потомъ побудуються, такъже люди кнзьские, панские и земянъские, духовныхъ и светскихъ, и ремесники всякие, которие в домех  ихъ у замъку, у пригородку, у паркане и за парканомъ мешкати будуть, мають и будуть повинъни посполъ з мещаны ншими тамошними дисенскими парканъ робити, башты будовати и землею фасовати, и всякие повинъности местские полнити. А судити ихъ мають старостове нши дисенские.

24. Рыболове тамошние дисенские местские мають мети волность в рекахъ рибу ловити кригою, кломлею, удою и инымъ малымъ начиньемъ, окромъ неводов  и иныхъ сетеи  великихъ.

25. Мають тежъ и вольно будеть мещаномъ дисенскимъ у месте тамошнемъ Дисенскомъ на местцу погожомъ домъ великии  гостиныи  для людеи  приеждчих  купецкихъ збудовати и пожитъки всякие с тог  дому на место брати вечне по тому, яко ся и в ынъшихъ местех  ншихъ гсдръских  упривильеваныхъ заховываеть. Вед  же поборы ншие великие и малые, такъже старосте ншому пожитъки належачие, от  купъцов  явка обвестъки, подужное и иные доходы, которие в Полоцку от  людеи  купецкихъ приежчихъ  гостеи  всяког  стану бывали, тые вси в целости на нас  и на старостъ ншихъ заховываемъ.

26. А што ся дотычеть перевозу тамошнего на реце Дисне и Двине, около тых  мещан  дисенскихъ заховываемъ, яко ся зъ замку Полоцкого на перевозе на Двине ку мещаномъ полоцкимъ заховывало, якии  платъ мещане полоцкие в год  от  перевозу з дому платили, по тому и дисняне платити на замокъ мають вечне.

И на то все дали есмо месту Дисенскому и всимъ мещаномъ тамошнимъ сес  ншъ привилеи, котории  подписавши рукою ншою гсдръскою на твердость тое речи и печать нашу к нему привесити есмо велели.

Писан  у Люблине, лета Божого нароженья 1569, мсца генвара 20 дня.
Подпис  руки гсдръское.
Матеи  Савицкии, писар  и секретар, стар. мелницкии, воиски дорогицкии.

______________________________________