Юридические документы, действовавшие на белорусских землях в период Великого Княжества Литовского, Русского, Жемойтского в составе Речи Посполитой – конфедерации с Королевством Польским
Привилей Стефана Батория, короля польского и великого князя
литовского, на Магдебургское право городу Пинску.
Милейчице, 12 января 1581 г.
Печатный документ. На старобелорусском языке. Помнікі права Беларусі XIV–XVI
стст.: прывілеі на магдэбургскае права. Мінск: БелНДІДАС, 2019
Тэкст[1]
Стефан, Божю млстю корол полскии, великии князь литвскии, рускии, прускии, жомоитскии, мазовецкии, ифлянтскии, кнжа седмикгродское и иных.
1. Ознаимуем сим листом нашим всим вобец и кождому зособна, кому то ведати належало, нинешним и напотом будучимъ, иж мы господар, хотечи ку лепшому пожитку и порадку подданых наших мещанъ и обователеи места нашого Пинского привести, ижбы теж в таковом порадку пожитки и доходы скарбу нашого розмножоны были, тым же подданым места нашого Пинского право немецкое, которое маидеборским названо ест, даем и сим листом нашим позволяем, вечными часы.
2. Ку которому праву, з оздобою и помноженьем их, печат местскую, лукъ з стрелою, назначаем и подаем, и в том же листе нашом, всимъ обователем пинским от насъ даном, таковую печат и гербъ на сведецство яснеишое, лукъ з стрелою, выразити есмо росказали.
3. Вызволяючи тыхъ подданых наших преречоного места Пинского от вшеляких правъ земъских Великог Князства Литовского и звычаев посполитых, которые право маидеборъское звыкли затруднивати, выимуючи теж обователи того места и передмещанъ теперешних и напотом будучих тым листом нашим на вечные часы от звирхностеи вшеляких всих и кождого зособна Великого Князства Литвского воевод, кашталяновъ, старостъ, державец, судеи, подсудков, врадниковъ и наместниковъ всяких, такъ, иж перед ними, албо которим колвекъ с них зособна о речи такъ великие, яко и малые, и выступъ якии колвекъ стояти албо отповедати, и для нестанья и приказанья которого колвекъ правного жадных винъ платити не будуть повинни, одно перед воитомъ того места теперь и напотом будучимъ, котории от нас водлугъ потребы подаван быти маеть, и перед бурмистром, с посродку себе водлугъ обычаю иных местъ Великого Князства Литвского обраным и постановленым, правом маидеборскимъ а водлугъ поступку и захованья того права отповедати и справоватися мають, то ест: перед воитом и лавниками того ж места присяглыми, водлугъ часу будучими, о речи доткливые и кривавые, яко о злодеиство, мужобоиство, на члонках охромене, пожогу и иные вшелякие речи и выступы злостливые, суду воитовскому належачие, а перед бурмистром и радами того места речи [и] справы вшелякие поточные, которие суду воитовскому[2] и радецкому належать, кождому жалобливому, такъ того места обователем, яко и постороннимъ особам отповедати будуть повинни, даючи и позволяючи воиту з лавниками, а бурмистру з раицами, в месте передречоном водлугъ часу установлеными, моц и звирхность вшелякие таковые справы, до суду их припалые, слухати, узнавати, судити, сказывати, карати водле выступку и бегу права маидеборского, моцю сего листу[3] нашого.
4. А всим поспол такъ того места нашого Пинского обователем, яко теж и посторонним особам, которие бы колвекъ зъ с казнями и декреты пъреречоных радъ места Пинского быти розумели, волно маеть быти от сказни[4] и декретов их до старосты нашого пинског, тепер и напотом будучого, отложивши до скринки местское водлугъ повинности права маидеборского копу грошеи, апелевати. А потом от суду старостиного и декретовъ его, речеи вшеляких судовых, до нас и до суду нашого, если бы была потреба, отзывати.
5. На котории врад бурмистровскии в том месте чоловекъ побожныи, в праве маидеборскомъ умеетныи, а в том же месте оселыи, с чотырох особ посполитого чоловека выбраных, а через тых же мещан старосте нашому оповеданых[5], звирхности нашое, один, через тогож старосту пинског, тепер и напотом будучого, потвержоныи и уставленыи быти маеть.
6. Так теж воита, чоловека побожного и умеетног, на которого суд справъ доткливых припадати[6] маеть, мы на том враде, уживанью и обыходе звыклом воитовскомъ особливым листом нашим до живота кождого зособна або до воли нашое потвержати и заховати з кгрунтами, на воитовство належачими, которих кгрунтов у волоках не болшъ, одно две волоки, а третяя на повинности местскои мают быти, и зо вшелякою властностью[7] обецуем.
7. Надто, хотечи мы тым подданым нашим, купцом и вшелякимъ реместником, также иным обователем и передмещаном того места Пинского щодреищую ласку оказати, постановит есмо умыслили [в томъ месте Пинскомъ] чотыри ярмарки дорочные, волные, то ест: першии на день Нового лета, другии на день Громниц, третеи на день семое суботы, четвертыи на день Успления Светое Пречистое, а тыиденныи торгъ на кождыи день понеделокъ [в кожъдую неделю] обыходити и отправовати уставляем, даючи моц и владность помененым мещаномъ пинскимъ преречоные ярмарки такъ дорочные, яко и торги кождое недели, дневъ и часов вышеи описаныхъ, обычаем иных местъ и местечокъ наших Великого Князства Литовского обыходити и отправовати.
8. А всимъ и кождому зособна купцом, фурманом, крамаром, прекупням, реместником, мещаномъ, селяном и людямъ всяког стану будучим до помененого места Пинского на дни и на часы помененые ялмарков дорочных и днеи торговых зо всякими товари и речами продажными приити и приехати волно быти маеть и товари таковые продавати, куповати, заменяти, и оные купецства и гандли зо всякими особами откул колвекъ прибылыми.
9. В которомъ месте Пинском бочку померную чотырох корцов мери краковъское, волную ку вымериванью всякого збожя, обователем тогож места Пинского привлащаем и приписуем.
10. А торговое местное[8], также от иных вшеляких речеи, куплеи товаров, которими колвекъ прозвиски названых, на кождыи тыидень, в кождыи понеделокъ, вечными часы, на пожитокъ нашъ мает быти выбирано от таковых людеи, которие на торгъ с товари своими приеждчати будуть, окромъ мещан, которие от торгового речеи купецких, водле обычаю иных мест наших упривильеваных, волни быти мают.
11. А если бы которого [кольвекъ] часу, на которомъ колвек соиме, для пилных и квалтовных потребъ Речи Посполитое, от нас гсдра и панов рад наших яковая сума пнзеи уфалена была, повинни будуть вышъмененые мещане пинские, водлугъ давног обычаю, такъ яко иншие места наши господарские, што на них с постановенья соимового вложоно будет, до скарбу нашого отдавати.
12. Которому преречоному месту Пинску и обователем его всим кгрунты местские, то ест у волоках, селисках, огородах, моркгах, застенках, сеножатех, лесех и иншие которие колвекъ посполитые, з давное помери ревизорское тому месту названые[9] и приданые, яко се вдолжъ и в шириню в межах и в границах своих стегают, нинешним привилем нашим потвержаем, приписуем и привлащаем, имъ самымъ и потомком их, на всякие потомные часы, обычаем иных мест наших упривилеваных держати.
13. А если бы коли кгрунты якие местские ставами нашими были заняты, або яко колвекъ месту отошли, або если бы напотом [ку потребе нашои] нешто [тых] кгрунтовъ местских отоидеть, тогды[10] мы преречоному месту таковым же кгрунтом i tak mnoho, iako otydziec, otmienu slusznuiu, wodlie ustawy naszoie, na inom miestcu grunty naszimi na takowoi zie powinnosci miestskoi starostie pinskomu oddaci y wypolnici[11] роскажемъ.
14. С которих кгрунтов местских, тымъ способомъ через нас тому месту приданых и приписаных, мещане преречоные, кождыи с них, вси цынши и вшелякие доходы, капчизны и [иные] повинности, водле уставъ наших, у Великомъ Князстве Литовскомъ через нас уфаленых, скарбу нашому належачие, звыклым обычаем в кождом року платити и полнити будуть повинни.
15. А иж з давных часов корчмы, шинки пивные, медовы и горелчаные, также померное, скопное, подужное, якъ в самомъ месте Пинску, такъ и в местечках нижеи описаных, в старостве Пинском будучих, в Мотелю, в Ноблю, в Погосте и по селах, в певнои суме пнзеи, то ест в пятисот копах грошеи литвских, людям постороннимъ звычаи был арендовати. Мы гд тую аренду хотечи при месте Пинском оставити, уставуем, иж воит з бурмистрами на местскои аренде корчмы вышеи помененые, померное, скупное[12], подужное, держачи от того всего якъ с Пинска, такъ и з местечокъ вышеи мененых, в кождыи год до старосты пинского[13] тую суму пнзеи пятсот копъ грошеи литвских выбравши, а староста до скарбу земского Великого Князства Литвского платити и личбу зуполную с того чинити [вечъными часы] повинни [будуть.
16. Такъ же платы местъские з волокъ, з огородов, зъ домовъ водъле давъных звычаевъ и постановенья ревизоръского такъ же воитъ пинскии выбирати и до старосты пиньского отъдавати вшакожъ, абы тымъ способнеи порядокъ местъскии опатренъ был.
17. Ратушъ на томъ местъцу, где мещаномъ пинскимъ налепеи видетисе будеть, збудовати позъваляемъ.
18. А на домъ воитовъскии водъле костеля светого Миколая в буркане альбо тежъ подле двора Борыса Копътевича местъце назначаемъ.
19. А што се дотычеть дому гостинъного, которые тые подданые збудовати мають и будуть повинни] в том месте Пинском коштом и накладом своим на приездъ людеи купецких, тот дом гостиныи, кромъ даванья всяких платов и доходов до скарбу нашого, вечными часы волныи быти мает.
20. Бровари, котлы до сыченья медов, до варенья пива и паленья горелки, также и солодовни кождому с тых подданых наших пинских в дому своем волно мети будет.
21. Надто, на тую ж потребу и пожиток посполитыи помененого места нашого дали есмо обователем его и тым привилем нашим даем доходы и пожитки з мостовъ, у бронах пинских стоячих, то ест от кождого воза купецкого по два пнзи белые, которими пенезми они тот мост направовати повинни быти мают.
22. К тому, пожитки и доходы з лазни, з ваги, с постригални, от ятокъ соленых и от хлебных, которие собе мещане в месте збудовати мают, вечне и на веки.
23. Которая лазня для безпечности от огня на стороне маеть быти збудована, а ижбы нихто в том месте лазень особливых при домех своих мети не смел, але одна лазня посполитая быти маеть.
24. А иж место без дерева на будованье и дрова обыитися не можеть, с пущъ наших, без шкоды оступовъ и ловов наших зверинных, откуль до сих мест бирали, и напотом волно брати позволяем.
25. Также на пожитокъ их местскии в реце Пине и ув озерах замковых, под местом будучих, ватою, волоками рибы ловити волни будуть.
26. К тому, всих мещанъ наших пинских от толокъ и квалтов волных мети хочемъ, вынявши властные потребы наши, кгды бы для яких кгвалтовъ до замку Пинского потреба вказывала.
27. Притомъ уставуем и то[14] мети хочем, абы шляхта, бояре, люди служебные которого колвекъ стану, которие в передречоном месте оселости свои мают и мети будуть, звлаща которие бы особливыми листы нашими с повинности местьское выняты не были, с таковых своих оселостеи поспол зо всими мещаны пинскими под право и юрздыцеею местскою отповедати и всякие повинности местские звыклые полнити.
Што все и кождую речь зособна во всех артыкулех и помъктехъ моцне имъ ховати, сами за себе и за потомки наши, королѣи их милость полских и великих князеи литвских, тым листом привильем нашим ховати обецуем на вечные часы. И на то дали есмо имъ сес нашъ лист, подписавши его рукою нашою гсдрьскою, до которого есмо и печать нашу привесити росказали.
Писан у Милеичичах,
лета Божого нароженья 1581, мсца генвара 12 дня, а панованья
нашогого [!]
пятого року.
Подпис ру
гдское.
Krzisztof
Radziwił, pan trocki, podkanclierzy
i
hietman
pol. Wiel.
X. Litewskieo.
[1] Падрыхтаваны на аснове копіі з Метрыкі ВКЛ. Гэта копія мае пропускі тэксту, значнейшыя з якіх аднаўляецца паводле пацвярджальнага прывілея Жыгімонта ІІІ Вазы ад 15 ліпеня 1589 г. (узяты ў квадратныя дужкі).
[2] У прывілеі 1589 г. — «бурмистровъскому».
[3] У прывілеі 1589 г. — «права».
[4] У прывілеі 1589 г. — «казни».
[5] У прывілеі 1589 г. — «оказаных».
[6] У прывілеі 1589 г. — «прыдати».
[7] У прывілеі 1589 г. — «владъностью».
[8] У прывілеі 1589 г. — «месное».
[9] У прывілеі 1589 г. — «назначоные».
[10] Слова «тогды» паўторана два разы.
[11] Фраза напісана лацініцай. У прывілеі 1589 г. — «и такъ много, яко отыидеть, отъмену слушъную водъле уставы нашое на иномъ местъцу кгрунъты нашыми на таковои же повинности местъскои старосте пинскому отъдати и вьсполънити».
[12] У прывілеі 1589 г. — «купное».
[13] У прывілеі 1589 г. — «нашого».
[14] У прывілеі 1589 г. — «потомъ».