Юридические документы, действовавшие на белорусских землях в период Великого Княжества Литовского, Русского, Жемойтского в составе Речи Посполитой – конфедерации с Королевством Польским

Привилей Стефана Батория, великого князя литовского и короля польского, на Магдебургское право городу Могилеву.
Быдгощ, 28 января 1577 г.
Печатный документ. На старобелорусском языке. Помнікі права Беларусі XIV–XVI стст.: прывілеі на магдэбургскае права. Мінск: БелНДІДАС, 2019

Старабеларускі пераклад^[1]

Во имя Боже. Аминь. Ку вечной памети тое речи, которая отходить. Иж высокий маестат княжат не так велце з звытязства албо з выймованя мест бываеть подвышон, яко с постановеня справ и справедливых устав, бо справедливость всего свѣта моцность и всих мест ненарушоный фундамент, а всякого порядку налепшые скутки сподеваются быти добрые, кгды злые и неразумные звычаи, не толко праву Божому, але теж праву прирожоному ку справованю рожаю людскаго противныи бывают (отринуты), а так речи бывают постановены, которые здорове людское заховывають, которые лепший стан людем приносять, которые также кождому то, што слушнаго и справедливого есть, отдавають. А для того мы, государ Стефан, Божою милостю король польский, великий князь литовский, руский, пруский, жомоитский, мазовецкий, киевский, подляский, лифлянтский, так теж княжа седмикгродское, ознаймуем через нинешний лист, которым потреба есть, всим нинешним и прийдучим, ведомость писма того маючим, иж кгды нам было преложоно от опатрных мещан места нашого Могилевского, иж велице были обтяжоны в плаченю вин и в тяжкостях нового постановеня от тых, которые им водлуг часу справованя, то есть через подстаростих и через иных урядников, от которых се жадным правом успомочы, ани листами, ани уставами первыми не могли отнять, ани защитить, где бы не были судом права немецкого успокоены и особливым привилеем, водлуг наданя иншым местам и много местечкам Великого Князства Литовского. А так просили нас тые мещане места нашого Могилевского своим и всего посполства именем, абы тое помененое право, которое зовуть майдебурское, им або тому месту ласкаве дати есмо рачили, обецуючы, кгды бы тую реч упрочили, не толко свой стан або места оного лепшым напотом учинити, але теж и скарб наш примноженя пожитков, (а) Великое Князство Литовское местом тым пограничным, яко се вжо от них почало оправовать, лепей обваровано и болшую безпечность против кождого неприятеля оттуль мети могло. Тогдыж то реч есть кождому невонтпливая, иж где мещане нищеють, там доходы и походы умнейшаются, а где мещаном права и доброе справоване справедливости надано и примножено есть, иж до такого места люде приходять и в таком месте радней мешкають, а такое место тым бываеть оборонейшое и доходы в нем размнажають.

1. А так справедливостю речи и прозбами их, та теж за причинами велможных рад и врадников нашых и теж зацнеурожоного Александра Ходкевича, старосты нашого могилевского и городенского, писмом ку той речи до нас даным будучи есмо приведены, з особливое ласки нашое, хотячи стан и кондыцию их болшую учинити, тое место наше Могилевское, яко у своих границах заложено есть, (вместо литовскаго права на) право немецкое, которое майдебурским названо, умыслили есмо преложити, якож и через теперешнее им писмо прекладаем, выймуючи всих и кождого зособна вперед реченнаго места нашого Могилевского мещан нинешних и напотом будучых от всякое юрисдикции, албо присуду и моцы, всих и кождого зособна воевод, каштелянов, державцов, старост, подстаростих албо их наместников, судей, подсудков и иных преложоных и децких.

2. А поддаючи их праву и суду права майдебурского, уставуем, иж на позване которых колвек персон якогож колвек стану и кондиции будучих о речы так великие албо малые, яко то о злодейство, о пожоги, о мужобойство, о втинане члонков и о иншые всякие выступки, кгды бы были позваны, не иначей, одно правом и судом немецким будуть повинни становитися и отповѣдати.

3. Ани теж старостове або иншые дикгнитарове и врадники нашы напротивко им не будуть могли сказовати албо их винами за то якож колвек карати, але вси обыватели того места пред войтом, на тот час будучым, во всих преречоных и инных справах водлуг звычаю права майдебурского (имеют являться и приносить на жалобы свое оправдание, не иначе, как по тому же праву), пред судом войтовским. А ку тому войту нашому даем и во всих криминалных, то есть крвавых речах и иншых судох поточных зуполную моц ведлуг описаня права майдебурского судити, и сказывати, и карати.

4. Мы теж войта, кгды того потреба укажеть, водлуг воли нашое подаем, и потомкове нашы подавати будуть; якож и на тот час тое войтовство урожоному Миколаю Ясенскому, писару нашому Великого Князства Литовского и подкоморему виленскому, до конца живота его даем и злецаем тым способом, абы тот писар наш и тое войтовство справовал, а на местцу своем лентвойта поставити могл.

5. Обыватели теж могилевские напотом на кождый рок чотыри персоны, годных веры, которые бы оседлости свои там же и знаемость права майдебурского мели, обрати и тые войтови нашому показати повинни будуть, (а войт) к ним пятого, сталой веры, которого бы годнейшого розумел быти, на мейсцу своем лентвойтом постановить и присегу от него, ним ему тот уряд злетить, прыйметь.

6. А тым обычаем на рок кождый бурмистры, райцы албо лавники и иншые особы урядовые з обираня мескаго, порядком и звычаем права майдебурского, або теж водлуг потребы того места, которые бы к тому годнейшые и пожиточнейшые в справах меских бытися видели, через войта нашого мають быти постановены, и справы (свои и) суды ведлуг звычаю и постановеня права майдебурского справовати мають.

7. А лентвойт з бурмистром, так яко се вышей поменило обраным и постановеным, с персонами, на то право майдебурское обраными, належачыми, в небытности войта, сиреч кождого зособна, судови войтовскому належачого, тою ж моцъю, которою теж войт будеть судить и сказывати.

8. А где бы колвек которому обывателеви того места албо кому колвек иншому от которого колвек з них на суде над право майдебурское што ку крывде уделано, будеть волно кождому от лентвойта до войта нашого, на тот час будучого, от войта (же), если бы потреба была, до нас и до потомков нашых апелевати, ведже и на дворе нашом не иначей, едно тым правом майдебурским сужоны быти мають, а иншым правом никоторым отказывать и усправедливатьсе неповинни.

9. А ижбы тое место неякое помножене оздобы мело, с тоеж ласки нашое государское надаем тому месту печать мескую, то есть вежу мурованую, высоко веденую, которою врад оного места у судов и иншых справах и потребах печатовати и того гербу ужывати мають вечными часы.

10. А што се дотычеть доходов и пожитков, напервей нашых, яко и того места, уставуем, иж се так заховати мають: напервей, иж што державцы и их намесникове и всякие урядникове в том месте великие тяжкости, крывды, вины, фантованя, децковане водлуг воли своей на тые мещаны вымышляли и з них брати были звыкли, мы то все проч отдаляючы, так хочем меть и через нынешнее писмо уставляем, абы всякие таковые крывды и драпезство в том месте устало, от которых обывателий места того всих, нынешних и напотом будучых, волных и вынятых чиним, якож через нынешнее писмо вызваляем и выймуем.

11. А што се дотычет вин судовых, судом права майдебурского в тым месте осужоных, так ховать уставуем, яко право меское немецкое, которое ест названо майдебурское, в собе маеть: с которых тых вин и со всякое речи осужоное на нас и на потомки нашы два пенези, а третий на войта, на тот час будучого, маеть приходить.

12. И на тое войтовство надаем дом и две волоки, лежачые у стене Дубенецкой, от всякого податку волные, вечными часы.

13. Ку тому допущаем теж (мещан) и обывателий места Могилевского дрова и бервеня на потребы домовые доброволне брати и вывозити з лесов и гаев нашых, на чотыри мили от места будучых.

14. Допущаем теж, вызваляем их от подвод, иж их державцом и их намесником не будуть повинни давати, ани тых подвод державцы або их врадники не мають выправовати, одно лентвойт або бурмистр в час потребы нашое и Речи Посполитое, а найбольш посланцом нашым, за особливым листом нашым государским, тогды вжо на тот час и з наукою, от нас старосте даною, и то за пенези возы, кони на подводы повинни будуть давать.

15. Выпусты теж около места быдлу своему всякому мещане мають мети так, иж вжо ани староста, ани его намесник николи не будеть мочы оным мещаном выпустов забороняти або им для того якого перенагабаня чинити и ничого на них за то брати не мають вечными часы.

16. Также теж волное рыб ловене на звыклых мейсцах, где их и до тых часов уживали, будуть мети и уживати.

17. А к тому важчое, або зваги, водлуг листу Жикгимонта Першого короля, который перед нами покладали, як издавна на пожиток меский (принадлежали), так теж (и ныне уступаем под таким условием, что они замковую стражу и пушкарей) накладом своим, подуг давного звычаю, держати и ховати мають.

18. К тому теж солодовники, яко до того часу волные мели, также и напотом завжды волные мети будуть.

19. К тому теж крамницы и коморы для складаня речей и товаров, так теж и ятки мясные, пострыгалню, дрягилное, лазню мейскую на пожиток того места, яко от враду меского будеть постановлена, тому месту надаем.

20. К тому теж дом гостинный, для людей прыежджых купецких збудованый, под право и присуд меский прилучаем и придаем, ведже пожытки нашы и старост нашых, которые от людей купецких и прыежджых были (по прежнему обычаю), в целости на нас, (преемников наших) и на старосты нашы отдаваны быти мають (по надлежащему).

21. К тому вси пожитки и доходы, тому месту Могилевскому здавна належачые, которых они до сих часов уживають, тые вси пожитки и доходы нынешним привилеем им даем и утвержаем, мають они тых всих пожытков так тых, которые в тым часе были (их собственные, и те равно, кои принадлежали) ку ратушу, на пожыток меский, уживати на вси и на потомные часы.

22. А за то обыватели места Могилевского тое место, як могуть, на лепшую безпечность обваровать мають.

23. Ратуш теж и школу християнскую збудовать и фундовать мають.

24. И повинни будуть, по звыклости, на улицах теж мейских, где бы колвек потреба того была, дороги мостить и оправовать.

25. И теж иншые послугы и роботы так стороны направованя, яко теж стороны замковое и меское, а звлаща часу кождое небезпечности, повинни будуть, по звыклости своей, полнити и подоймовати.

26. Уставуем теж и то мети хочем, абы вси люде князские, панские, духовных и свецких станов, яко теж иных людей шляхецких, которые колвек в том месте нашом Могилевском оседлости свои мають, яко теж и тые, которые на предместю мешкають, которые теж або купецтвом, або ремесла, або торгов меских уживають, кгды податок який на то место уфален будеть, окром тых, которые бы особливыми листы нашыми (освобождены были, оный наравне с гражданами) тамошнеми платить, также до оправы и обороны замку и месту, водлуг давного звычаю и звыклой повинности, повинни будуть завжды (быть готовыми), без всякого спротивеня и вымовки.

27. А цынши з кгрунтов, месту приписаных, так теж капчызны и иные доходы, до скарбу нашого належачые, в кождый рок, водлуг давное уставы ревизорское, звыклым обычаем полнити и платити будуть, а серебщызны, кгды на другие места нашы у Великом Князствѣ уложены будуть, (и они равно нам и преемникам нашим выплачивать обязаны).

28. А над то, ачколвек же неделные торги, водлуг давного постановеня продков нашых, в том месте суть постановлены, ведже и мы, хотечи того места нашого мещаном и обывателем гойнейшую ласку оказати и пожытки их розмнажати, и кондицию их, яко се вышей поменило, лепшую оказати, постановилисмо в том два ярмарки годовые, то есть на свято святого Иліи, а другий на свято св. Стефана.

29. А неделный торг у пятницу на кождый день постановили есмо и постановляем, даючи моц и власть помененые ярмарки годовые и торги тым людем часов описаных мети и отправовати.

30. А всим якогож колвек стану людем купецким, фурманом, откул бы колвек до того места нашого з якими ж колвек товары и речми продажными, складать, продавать, заменять и на тые торги, отдавшы цла звыклые, прыежджати и з них волно и безпечно отъехати, окром таковых людей, которые бы там приехавшы, допустившисе якого злочынства, такового права и волности уживать и товарыства межы людей добрых мети годны не были.

А на твердость и на яснейшое сведецство тых всих речей, вышей описаных, дали есмо тому месту нашому Могилевскому сей привилей, до которого печать нашу Великого Князства Литовского привесити есмо казали и руку нашу государскую подписали есмо.

Дан у Бидкгощу, дня 28 месеца генвара, року Божего нароженя 1578, а панованя нашого року первого, при бытности велебного в Бозѣ отца Петра Дунина-Белского, бискупа премыслского, канцлера коронного; и теж при бытности велможного Петра Зборовского, воеводы и старосты краковского; пана Остафея Воловича, каштеляна троцкого, В. К. Л. подканцлерого, берестейского и кобринского старосты; Яна с Тенчына, каштеляна войницкого, подкоморого нашого; Андрея Опалинского, найвышшого маршалка; Яна Замойского, подканцлерого корунного, старосты белского, заменчинского и кнышинского; и при бытности инных врадников нашых, верне нам милых.

Остафей Волович, пан троцкий, подканцлерий Велик. Княз. Лит.